रेजिनाको चुनौती रञ्जनालाई

'आफ्नो हैसियत नै नहेरीकन अरूलाई गाली गर्दा वा तथानाम भन्दा भोलि मुख देखाउने लाज मर्नुपर्ने अवस्था पनि आउन सक्छ,' यो आक्रोश हो नायिका रेजिना उपे्रतीको। उनको यो आक्रोश लक्ष्यित थियो अर्की नायिका रञ्जना शर्मा भट्टराईमाथि। एक टेलिभिजनको चलचित्रसम्बन्धी कार्यक्रममा रञ्जनाले 'मलाई रेजिनाको अनुहार नै मन पर्दैन' भनेर भनेपछि यतिबेला रेजिना रञ्जनासँग रुष्ट छिन्। 'मैले रञ्जनालाई त्यस्तो के गरेकी छु र मप्रति दुराग्रह राखेकी उनले,' रेजिना थप्छिन्, 'अरूलाई मन नपराउनेले पहिले आफ्नो अनुहार ऐनामा हेर्नुपर्‍यो र पहिले आफ्नै मूल्याङ्कन गर्नुपर्‍यो।' हालसम्म ६० भन्दा बढी सिनेमामा काम गरिसकेकी रेजिनाले केवल तीनवटा सिनेमामा काम गरेकी रञ्जनाले आफूलाई त्यसो भनेकोमा हाँसो उठेको कुरा बताएकी छिन्। 'रञ्जनाको हैसियत नै पुगेको छैन उनले मेरो मूल्याङ्कन गर्न। केवल श्रीमान्को फिल्म खेलेकी, तै पनि फ्लप। तिनले कसरी आँट गरिन् मेरो मूल्याङ्कन गर्न?,' रेजिनाको प्रश्न छ। तर, यो विषयमा भने रञ्जना खासै बोल्न चाहिनन्। 'मैले यो कुराले यस्तो उग्ररूप लिन्छ भन्ने बुझेकी भए त्यो कार्यक्रममा म यस्तो कुरा बोल्दिनथेँ,' रञ्जनाको सटिक जवाफ छ।